Lífið tekur við í Urriðaholti
Eftir því sem fjölgaði í Urriðaholti fóru íbúar að kynnast gæðum þess betur og tókust um leið - í samvinnu við bæjarfélagið - á við áskoranir á borð við gríðarlega fjölgun barna á leikskólaaldri og vandasaman snjómokstur.
Fyrst hægt og svo hratt
Fyrsta fjölskyldan flutti í Urriðaholt árið 2010. Til ársins 2015 fjölgaði afar hægt í hverfinu, nokkrar fjölskyldur fluttu inn í einbýlis- og parhús við Keldugötu og Kinnargötu á árunum 2012 til 2014. Það var ekki fyrr en 2015 sem fyrstu íbúarnir fluttu inn í fjölbýlishús við Holtsveg. Strax upp úr 2016 fór að fjölga að ráði í hverfinu og eftir 2018 bættust við hundruð nýrra íbúa á hverju ári. Fjölgun barna var áberandi mikil og um tíma voru 13% íbúa í hverfinu á leikskólaaldri. Mesta íbúafjölgun á einu ári var 2021, en þá eignuðust 727 einstaklingar lögheimili í hverfinu.
Í töflunni hér að neðan má sjá fjölda íbúa með lögheimili í Urriðaholti í loks hvers árs frá 2010 til 2024 samkvæmt yfirliti frá Þjóðskrá.
Í töflunni má sjá fjölda íbúa með lögheimili í Urriðaholti í loks hvers árs frá 2010 til 2024 samkvæmt yfirliti frá Þjóðskrá.
| Íbúar í lok hvers árs | Fjöldi |
|---|---|
| Með lögheimili í lok árs 2010 | 5 |
| Með lögheimili í lok árs 2011 | 5 |
| Með lögheimili í lok árs 2012 | 15 |
| Með lögheimili í lok árs 2013 | 16 |
| Með lögheimili í lok árs 2014 | 24 |
| Með lögheimili í lok árs 2015 | 72 |
| Með lögheimili í lok árs 2016 | 287 |
| Með lögheimili í lok árs 2017 | 529 |
| Með lögheimili í lok árs 2018 | 1.018 |
| Með lögheimili í lok árs 2019 | 1.388 |
| Með lögheimili í lok árs 2020 | 1.989 |
| Með lögheimili í lok árs 2021 | 2.716 |
| Með lögheimili í lok árs 2022 | 3.243 |
| Með lögheimili í lok árs 2023 | 3.746 |
| Með lögheimili í lok árs 2024 | 4.220 |
Plokkið leiddi til stofnunar íbúasamtaka
Fjúkandi rusl fylgir gjarnan byggingarframkvæmdum og Urriðaholt var engin undantekning. Vegna umfangs framkvæmdanna fundu íbúar sérstaklega mikið fyrir ruslinu og erfitt var að henda reiður á hvaðan það fauk. Nokkrir íbúar tóku sig því saman í apríl 2018 og boðuðu til fyrsta plokkdagsins í hverfinu, á Degi jarðar. Framtakinu var afar vel tekið og leiddi þessi samstaða til stofnunar íbúasamtaka í Urriðaholti. Plokkdagur hefur verið haldinn árlega í hverfinu síðan þá.
Þrengsli eða nánd – skipulag Urriðaholts er „öðruvísi“
Í gegnum tíðina hafa líflegar umræður skapast meðal íbúa í Urriðaholti um þann þéttleika sem einkennir skipulag hverfisins. Allt er það samt með ráðum gert, áherslan var lögð á að skapa tilfinningu fyrir rótgróinni og þéttri byggð og stuðla að auknu öryggi vegfarenda.
Þegar snjóar á þröngar götur
Mikil snjókoma og þröngar götur fara ekki endilega vel saman. Byrjunarörðugleikar voru í snjómokstri og hálkuvörnum í Urriðaholti og ekki laust við pirring meðal íbúa sem illa komust leiðar sinnar. Það tók starfsmenn Garðabæjar tíma að ná tökum á hvernig best væri að bregðast við þessum aðstæðum.
Útivistarperlur á næsta leiti
Íbúar í Urriðaholti hafa oft á orði hvað möguleikar til útivistar eru miklir í næsta nágrenni. Stutt er yfir í Heiðmörk og upplönd Garðabæjar til austurs, vinsælt er að ganga í kringum Urriðavatn og út á hrauntangann og til norðurs liggja stígar um Vífilstaðahraun.